Komisioni i Medias do të zhvillonte sot një dëgjesë me gazetaren Alida Tota e cila është pushuar nga puna pas investigimit në landfillin e Sharrës ku humbi jetën Ardit Gjoklaj.
Disa deputetë të shumicës nuk janë paraqitur qëlllimisht në Komisionin e Medias për të bllokuar seancën, por opozita kërkoi të niste dëgjesa duke thënë se ishte kuorumi i nevojshëm, por sërish dëgjesa nuk është zhvilluar.
Për këtë arsye, deputeti demokrat Genc Pollo ka akuzuar drejtpërdrejt kryeministrin Edi Rama se ka bllokuar seancën dëgjimore. “Garda bllokoi mediat për të ndjekur komisionin. Kërkojnë të mbyllet ngjarja ku u vra i mituri”, tha Pollo.
Ndërsa deputeti Alfred Peza është justifikuar se “maxhoranca nuk bëhet pjesë e një shou të Partisë Demokratike. Dëgjesa është një kauzë që kërkon ta amplifikojë PD-ja”.
Vetë gazetarja Alida Tota është shprehur se censura vazhdon duke shtuar se disa media online janë mbyllur.
