Dy seancat dëgjimore në dy komisionet parlamentare ai i shëndetësisë dhe i medias nuk u zhvilluan ditën e sotme. Shkak për këtë sipas partisë Demokratike është bërë mazhoranca.
Ndaj PD i ka paraqitur sot një kërkesë Kuvendit për të thirrur Konferencën e Kryetarëve.
Sipas opozitës, pengimi i këtyre seancave dëgjimore është një precedent i rrezikshëm.
E para seancë që dështoi ishte ajo e Komisionit të Medias, ku do të dëgjohej gazetarja Alida Tota, e cila pretendon se u pushua nga puna pas investigimit për vdekjen e 17-vjeçarit në landfillin e Sharrës.
Gazetarja Alida Tota do të fliste sot për arsyet që çuan në pushimin e saj si drejtoreshë e televizionit “A1 Neës”, por në komision munguan disa deputetë të mazhorancës, duke bërë që seanca dëgjimore të dështonte.
Kryetari i Komisionit të Medias, Genc Pollo akuzoi kryeministrin Rama për bllokimin e seancës, duke theksuar se po kërkon të mbyllet çështja e vrasjes së të miturit Ardit Gjoklaj në landfillin e Sharrës. Gjithashtu Pollo tha se është e papranueshme që Garda nuk lejoji mediat në sallën ku zhvillohen mbledhjet e Komisionit të Medias. Ndërkohë, nënkryetari Alfred Peza e cilësoi dëgjesën me gazetaren si një kauzë që kërkon ta amplifikojë opozita. Peza tha se mazhoranca nuk do të bëhet pjesë e kësaj dëgjese.
