Prokuroria e Krimeve të Rënda ka kërkuar caktimin e masës së sigurisë arrest me burg për tetë persona nga Fieri, të dyshuar për trafikim të lëndëve narkotike, duke vepruar si një grup i strukturuar kriminal. Këta persona u arrestuan pak ditë më parë nga policia e Fierit.
Hetimet për këtë grup kanë nisur nga Prokuroria e Krimeve të Rënda që nga qershori i këtij viti, pasi një prej të arrestuarve, Meto Skënderaj dyshohet se siguronte sasi lënde narkotike, në bashkëpunim me Leo Tafa dhe Mehmet Skënderaj. Më pas ai i magazinonte ato duke i përpunuar e tharë me qëllim shitjen jashtë territorit shqiptar.
Sipas Prokurorisë organizatorët e këtij rrjeti trafiku janë Leo Tafa, Meto Skenderaj dhe Mehmet Skënderaj, për të cilët prokuroria ka kërkuar arrest me burg.
Ndërsa për 5 persona të tjerë të dyshuar si punëtorë organi i akuzës ka kërkuar burg me afat 30 ditë.
Dosja
Hetimet kanë nisur në qershor-Prokuroria për Krime të Rënda ka nisur hetimet në qershor 2016, pasi Meto Skënderaj dyshohet se, me veprime aktive bashkëpunuese në kuadër të pjesëmarrjes në grupin e strukturuar kriminal me shtetasit Leo Tafa dhe Mehmet Skënderaj, siguronte sasi bimesh narkotike, të cilat me pas i ka magazinuar ato, duke i përpunuar e përgatitur (tharë) me qëllim shitjen dhe trafikimin e tyre jashtë territorit shqiptar. Këto veprime i ka kryer në banesën e shtetasit Mehmet Skënderaj, ne fshatin, Ninesh, Komuna Fratar/Mallakaster, i cili ka vënë në dispozicion banesën e tij. Për të realizuar këtë atij i është dashur edhe ndihma e shtetasve Ardit Tafa, Dorian Tafa, Eglantin Tafa dhe Miklovan Kuka (te gjithë nga fshati Rreth, Komuna Libofshe, Fier), dhe Artan Skëndaj (ky i fundit banues në Ninsh), si dhe ndihma e shtetaseve J.M dhe T.GJ.
Droga përpunohej në shtëpinë e Mehmet Skënderaj
Në kontrollin që policia bëri në banesën e Mehmet Skënderaj, në tre dhoma të banesës gjeti grumbuj sasish bimësh narkotike në gjendje të tharë, dhe në proces tharjeje, si dhe nëpër tavane të dhomave gjeti degëza bimësh narkotike në proçes tharjeje. Këtu u sekuestrua sasia prej 145 kg lëndë narkotike e dyshuar Cannabis Sattiva, dhe sasia prej 425 fara bime e dyshuar Cannabis Sattiva, që u gjet në një kuti plastike në formë të rrumbullakët, me peshë 26.70 gram. Tek gjetja dhe sekuestrimi i kësaj sasie bimësh narkotike në proçes përpunimi për shitje, dhe e farave të bimëve narkotike, u arrit të shkohej, në datë 23.10.2016, kur rreth orës 07.00, forcat e policisë ndoqën mjetin tip “Audi A4” ngjyrë të bardhë, me targa AAxxxJN, në të cilin udhëtonin shtetasit Meto Sheme Skënderaj, Leo Tafa, Ardit Tafa, J.M dhe T.GJ, i cili ndaloi në banesën/ ambientin ku ishte magazinuar bima dhe farërat e narkotikut (lartcituar).
Mehmet Skenderaj tha se ishte punëtor
Pas kësaj, u ndërhy ne banesen e shtetasit Mehmet Skenderaj, ku u gjeten, veç Mehmet Skënderaj, edhe shtetasit Dorian Tafa, Eglantin Tafa, Miklovan Kuka dhe Artan Skënderaj. Në momentet e ndërhyrjes së policisë në banesë, shtetasit Dorian Tafa, Eglantin Tafa dhe Miklovan Kuka, u larguan me vrap në drejtim të një përroi përgjatë një terreni të pyllëzuar, dhe pas ndjekjes përreth 1 (një) kilometër, ata u arrestuan. Mehmet Skënderaj u deklarua se kishte vendbanimin aktual në lagjen Cole/Vlorë, dhe se ishte thjesht një ‘’punëtor’’, të tjerët nuk dhanë asnjë shpjegim për faktin e verifikuar në vend, ndërsa Artan Skënderaj u deklarua se nuk kishte asnjë lidhje me këtë që u konstatua.
Si organizatorë dyshohen Leo Tafa, Meto Skënderaj dhe Mehmet Skënderaj, ndërsa për ata të dyshuar si ‘punëtorë’ është kërkuar arrest me burg me afat 30 ditë, për Indrit Tafa, Dorian Tafa, Eglantin Tafa, Artan Skënderaj, Miklovan Tafa.
