Pak ditë më parë policia shqiptare bëri të ditur se kishte vendosur më shumë se 300 efektivë të saj për të patrulluar në kufirin detar dhe atë tokësor për të ndaluar trafikun e drogës, drejt Italisë dhe vendeve të tjera.
Por masat e policisë shqiptare duket se nuk janë të efektshme kur bëhet fjalë për transportin e qindra kilogramëve kanabis sativa në drejtim të shtetit fqinj. Një gomone me 700 kilogramë kanabis sativa është kapur gjatë ditës së djeshme në brigjet e Barit.
Lënda narkotike kapte vlerën e 5 milionë eurove në treg. Në pranga është vendosur edhe një skafist italian i njohur, i ndaluar disa herë më parë për trafik droge. Sipas mediave italiane i arrestuari është Renato Colasuonno, 64 vjeç.
Policia italiane ka bërë të ditur se, gjatë mesnatës së djeshme në radar ishte shfaqur një mjet lundrues që ishte ndaluar në zonën Torre a Mare. Policia ka gjetur gomonen e mbushur me drogë, shkruan Syri.net.
I arrestuari ka treguar se lëndën narkotike e kishte marrë në Shqipëri, ndërsa policia ka kapur edhe makinën ku italiani do ta ngarkonte kanabisin.
