Kryetari i LSI-së, Ilir Meta mori pjesë në një në takim me strukturat e Lëvizjes Rinore për Integrim të Durrësit, ku u shpërndanë 300 karta të reja anëtarësimi. Kreu i LSI-së shpjegoi pse kërkon një mandat tjetër në krye të partisë.
“Shqipëria duhet të ecë përpara me hapin e ëndrrave të të rinjve. Jam kandidat për kryetar i LSI-së, jo thjesht për të marrë një mandat të ri, por si mundësinë më të mirë që ta investoj për të ngritur LSI-në në një stad më të lartë”, tha Meta në këtë takim.
Duke folur për zgjedhjet e datës 6 nëntor, Ilir Meta tha se synon një mandat të ri në krye të kësaj force politike për të ngritur LSI-në në një stad më cilësor e përfaqësues. “Në 6 nëntor unë do të jem kandidat për kryetar i LSI-së, jo thjesht për të marrë një mandat të ri të Kryetarit të Lëvizjes Socialiste për Integrim, por e shoh këtë mandat të ri si mundësinë më të mirë që ta investoj për të ngritur LSI-në në një stad më të lartë, më të ri, më cilësor, më përfaqësues, më gjithëpërfshirës dhe për të realizuar një LSI shumë më të re e cila e ndihmon Shqipërinë që të ecë me hapin e ëndrrave të të rinjve”, – tha Meta, teksa shtoi: – “Në programin tim për të ardhmen, fuqizimi i LRI-së në të gjithë strukturat vendimmarrëse të Lëvizjes Socialiste për Integrim është prioritet kryesor”.
