Dush i ftohtë dhe leksion përulësie për Tiranën, të dyja i ofron Luftëtari. Skuadra e ngjitur këtë sezon në Superiore ju shkakton humbjen e parë bardhebluve që i japin fund festave pasi u mposhtën 2-1 në Peqin duke humbur një shans të artë për tu afruar me kreun.
Bardheblutë provuan për herë të parë në këtë kampionat shijen e humbjes në fushën e Peqinit.
Gjirokastritët luanin në këtë fushë si ekipi pritës dhe ashtu u sollën thuajse gjatë gjithë lojës. Golin do ta gjenin në minutën e 41, por gëzimi i avantazhit zgjati vetëm 4 minuta, pasi Taku barazoi shifrat pak minuta nga fërshëllima e fundit të pjesës së parë.
Fraksioni i parë ndeshjes u mbyll në barazim 1-1, ndërsa Tirana goditet sërish pak minuta pas fillimit të pjesës së dytë dhe këtë herë është Bregu ai që i ndëshkon.
Bardheblutë u munduan të kontrollojnë lojën, por përpjekjet e tyre për të dërguar topin në rrjetë ishin të vakta dhe nuk kishin qartësi në fazën ofensive, ndërsa Luftëtari u shfaq disa herë rrezikshëm në portën kundërshtare dhe ishte fati ai që e shpëtoi Tiranën nga një humbje më e thellë.
Ndërkohë, në ndeshjen tjetër të kësaj të diele të Kategorisë Superiore, Vllaznia mposhti minimalisht 1-0 Teutën e Durrësit.
