Pas arrestimit nga Policia e Tiranës të gardistit Geraldo Guci, si autor i dyshuar i 4 grabitjeve me armë, Ministria e Brendshme njoftoi se Garda e Republikës e ka përjashtuar efektivin 21 vjeçar.
Guci mësohet se ishte në periudhë prove dhe ende nuk ishte pajisur me armë nga Garda.
Ndërsa praktikën si pjesë e Gardës së Republikës ai po e bënte pranë Parlamentit.
“Garda e Republikës, me urdhër të komandantit të saj, ka përjashtuar efektivin Geraldo Guci, i arrestuar nga Policia e Tiranës për veprat penale të ‘vjedhjes me armë’ dhe ‘prodhimit dhe mbajtjes pa leje të armëve luftarake dhe municionit’.
Ish efektivi Guci, 21 vjeç, ishte pranuar në radhët e Gardës së Republikës në korrik të vitit 2016 dhe ishte në periudhë prove.
Për këtë shkak ai nuk ishte i pajisur me armatim personal, si punonjës i Gardës së Republikës”, tha dje zyrtarisht Ministria e Brendshme.
