Qyteza e Milotit në rrethin e Kurbinit është tronditur sot pasi një familje me gjashtë pjesëtar kërcënon me vetëvrasje masive. Ata kanë marrë dy bombola gazi dhe i kanë vënë aty. Familja Lleshi ka kërcënuar se do të hedhin veten në erë.
“Do të hedhim veten në erë, na kanë lënë në mes të katër rrugëve”, është shprehur kryefamiljari.
Situata e vështirë ekonomike e ka detyruar familjen Lleshi të ndërmarrë një veprim të tillë.
Pas përmbytjes së banesës nga reshjet e një jave më parë, ata kanë ngelur pa një strehë. Përgjatë këtyre ditëve ata thonë se kanë fjetur tek fqinjët, madje edhe në rrugë kur s’kanë patur mundësi tjetër.
Të mbetur pa asnjë alternativë, nëna, djali i saj me gruan, dhe dy fëmijët e çiftit kanë dalë në rrugë duke protestuar, teksa mbajnë në duar dy bombola gazi 25 kilogramëshe dhe një shkrepëse.
Ata thonë deri më tani askush nuk u është drejtuar për të parë në ç’kushte jetojnë, apo për dëmet e shkaktuara nga përmbytja.
Pjesëtarët e familjes Lleshi kërkojnë që t’u jepet një zgjidhje për situatën në të cilën ndodhen, përndryshe kërcënojnë se do të vetëflijohen, duke hedhur veten në erë.
Sakaq, në vendngjarje kanë mbërritur forcat e policisë dhe kanë nisur negociatat me familjarët.
Më 13 tetor, “News 24” transmetoi apelin e familjes Lleshi për ndihmë, pas dëmeve të shkaktuara nga përmbytja.
