Ndrangheta e zonës emiliane në Itali nuk bënte biznes vetëm në Modena, Rexho, Parma dhe Mantova, por synonte të shtrinte biznesin e saj edhe në Shqipëri.
Pino Giglio, një i penduar i drejtësisë italiane ka rrëfyer se si grupi mafioz ‘Ndrangheta’ ka korruptuar dy zyrtarë shqiptarë në vitin 2011 për të marrë tenderin e një autostrade me vlerë 18 milionë euro.
Gazzetta di Modena shkruan se i penduari Pino Giglio, i dënuar me më 12 vjet burg në kuadër të hetimeve për dosjen “Aemilia”, ka dhënë detaje rreth aferës së bërë me zyrtarët shqiptarë, në kohën e qeverisjes së Berishës.
Sipas tij, premtimi për kontratën parashikonte një ryshfet 10 përqind të shumës, ndërkohë që në skenë del edhe një polic, emri i të cilit nuk bëhet i ditur, që ishte ndërmjetësi me zyrtarët shqiptarë, e që kishte marrë 5% të shumës.
I penduari, Giglio, kishte lidhje me familjen Bianchini di San Felice në Itali.
Ai thotë se Giglio dhe Bianchini ishin të gatshëm të pasuroheshin me një biznes të rëndësishëm në Shqipëri. “Në Shqipëri Giglio dhe një tjetër person i quajtur Paquale Rilo krijuan një shoqëri, ‘Italcantier’, së bashku me një shqiptar të quajtur Refat Muzhaqi”- ka thënë i penduari, duke shtuar se kur të nënshkruhej kontrata për një autostradë pranë Tiranës, do të bëhej edhe afera me 10% të vlerës totale. Bëhet fjalë për një investim që i takon vitit 2011, por pa specifikuar detaje.
Ata kanë udhëtuar disa herë drejt Shqipërisë, për të njohur nga afër situatën. Lëvizjet bëheshin me avion nga Bolonja, Milano e Tiranë.
Gjatë fluturimit me ta ishte gjithnjë një polic. “Ai ishte në kontakt të vazhdueshëm me shqiptarët dhe kishte thënë se është paguar me 5% të vlerës së kontratës”-ka dëshmuar më tej i penduari.
Por mesa duket ky biznes shkruajnë mediat italiane nuk u konkretizua asnjëherë edhe pse pati ankesa nga pala shqiptare. Marrëveshja mesa duket nuk u arrit pasi pati zënka mes njërit prej italianëve dhe policit i cili i detyrohej 10 mijë euro.
