Tre zyrtarë të seksionit të pyjeve në Bashkinë e Pukës kanë përfunduar në prangat e policisë, pasi akuzohen për shpërdorim detyre.
Policia njofton se është arrestuar shtetasi Gjin Filipi, 55 vjeç, shef seksioni i pyjeve në bashkinë e Pukës, Astrit Hyseni, 42 vjeç, specialist pyjesh si dhe Enver Laçi, 37 vjeç, specialist pyjesh. Në pranga ka përfunduar edhe administratori i një subjekti, 59-vjeçari Frrok Gjoka.
“Nga hetimet e kryera ka rezultuar se këta shtetas kanë shpërdoruar detyrën duke autorizuar në mënyrë të paligjshme prerjen e një sipërfaqe prej 3000 metër katror në ekonominë pyjore Krrab – Bushat administratorit të subjektit “Gjoka shpk”, shtetasit Frrok Gjoka”, sqaron policia.
