Kryeministri Edi Rama dhe kryeministri serb Aleksandër Vuçiç në Forumin e Sigurisë në Beograd kanë komentuar marrëdhëniet shqiptaro –serbe, sigurinë në rajon dhe rrugën drejt integrimit evropian. Mesazhi i përcjellë nga dy kryeministrat gjatë forumit ishte që vendet e Ballkanit duhet të lënë pas mënyrat “fëminore” të sjelles ndaj njëri-tjetrit siç ka ndodhur në të kaluarën, dhe të bashkëpunojnë në rrugën drejt integrimit.
Në fjalën e tij, kryeministri Vuçiç theksoi se vendet e rajonit nuk duhet të bëjnë gjëra kundër njëri-tjetrit, pasi kjo pengon integrimin dhe rritjen ekonomike, ndërsa vuri theksin tek bashkëpunimi.
“Jam krenar që them se dëshirojmë marrëdhënie më të mirë me shqiptarët dhe boshnjakët. Pasi kështu në mënyrë potenciale do të kemi rritje më të madhe ekonomike se vende të tjera të BE. Nëse bëjmë gjëra kundër njëri-tjetrit nuk kemi mundësi të bëjmë përpara, por nëse bashkëpunojmë do të ecim më mirë. BE shpesh vendos detyra të reja”, tha kryeministri serb.
Sakaq, edhe kreu i Qeverisë shqiptare theksoi se me rëndësi nuk është vetëm anëtarësimi, por e gjithë rruga drejt integrimit dhe e modernizimit të shoqërive.
“Mendoj se ne të paktën këtu në Ballkan do të jemi të qartë për një pikë të thjeshtë: procesi i BE për ne nuk është një udhëtim për të shkuar diku, sepse disa njerëz e presin këtë nga ne. Por është një rrugë e modernizimit që është e mundur për shoqëritë tona, përmes integrimit në BE. Në këtë moment është me rëndësi integrimi pasi na ndihmon që të ndihmojmë shoqëritë tona. Europa ka qenë gjithmonë në një kohë të mirë kur ne ishim rrëmujë. Sot po përpiqemi të jemi ne një formë të mirë, dhe ata po bëjnë rrëmujë, dhe duket sikur nuk do të ketë një moment kur do jemi të dy palët në formë të mirë.
Sa i përket reformës në drejtësi, do të thoja se kemi bërë një hap me rëndësi. Kemi kaluar një reformë kushtetuese, me ndryshime që janë kaq radikale. Njerëzit mund të kenë ndjesi të ndryshme për Brukselin, Moskën, etj. Por duhet të na lejojnë të dalim nga historia e një rruge jo shumë bujare, dhe të përpiqemi të ecim bashkë drejt një rruge të përbashkët. Ne duhet të jemi modernë më në fund, dhe të dalim nga mënyrat fëminore, si peng i së kaluarës”, u shpreh kryeministri Rama.
Duke u ndalur tek detyrat e përcaktuara nga BE, Vuçiç tha se ka një “ngërç” në Serbi, pasi qytetarët nuk e kanë kuptuar saktësisht se çfarë kanë përfituar në këto vite nga procesi.
“Nuk duhet të fajësoj BE edhe pse e mendoj atë çka thashë për procesin e integrimit. Nuk kemi qenë të aftë për t’i shpjeguar popullit tonë si duhet se çfarë kemi arritur së fundmi. Njerëzit nuk e kanë ndjerë ndryshimin në xhepat e tyre”, tha Vuçiç.
