Kryetari i PDIU-së, Shpëtim Idrizi, e ka komentuar me kritika qëndrimin e kryetarit të Kuvendit Ilir Meta në Athinë, duke e vlerësuar si një gjuhë të pamjaftueshme të kryeparlamentarit shqiptar.
I ftuar mbrëmë në studion e Top Show, Idrizi ka argumentuar pse politikanët shqiptarë nuk mund të intimidohen më nga Çështja Çame.
Idrizi u shpreh ndër të tjera se Meta nuk u duk shumë i qartë, nëse çështja e varrezave greke është e së shkuarës apo e së ardhmes, pasi pranoi deri diku se Çështja Çame është e së shkuarës. Është fjala për qëndrimin e tij “europian”, pasi presidenti grek i kërkoi atij zgjidhjen e çështjes së varrezave greke.
Edhe Pëllumb Xhufi ka bërë një kritikë për Ilir Metën për përbërjen e delegacionit.
“Çështja “Çame” nuk është një çështje e shqiptarëve të Jugut, por e të gjithë shqiptarëve. Njësoj si çështja e Kosovës. Ndaj them që përbërja e delegacionit, dua ta them nuk ishte ajo që duhej. Unë nuk kam asgjë dhe më vjen mirë që në të kishte njerëz të nderuar, deputetë dhe përfaqësues të minoritetit grek, por nuk ka arsye që në delegacion të ketë vetëm përfaqësues nga zona e Jugut, madje nga ajo që njihet si zona e Vjosës. Apo siç e quajnë grekët “Vorio Epiri”, tha Xhufi.
