Pasi habiti shumëkënd duke deklaruar se Tirana ka nevojë për kulla të tjera të larta duke paralajmëruar një betonizim të ri të kryeqytetit, kryetari i Bashkisë së Tiranës Erion Veliaj ka në plan edhe një shpikje të radhës.
Pallatet e vjetra të ndërtuara në periudhën e komunizmit do të rikonstruktohen, duke favorizuar subjektin që e merr përsipër të ndërtojë një kat shtesë në to.
Bashkia e ka justifikuar këtë fakt se bëhet për të përmirësuar cilësinë e banimit në këto pallate.
“Zhvilluesi që merr përsipër që të ndërtojë një kat shtesë, ka detyrimin të termoizolojë ndërtesën, të rregullojë ambientet e përbashkëta, ndoshta të instalojë një citofoni te dera dhe si këmbim për këtë shërbim, me dakortësinë e banorëve, të marrë leje për një kat shtesë” ka deklaruar për mediat Ditjon Baboçi, drejtor i Planifikimit dhe Zhvillimit të Territorit.
Këtu shtrohet problemi, pasi një numër i madh biznesmenësh janë të interesuar të shtojnë kate shtesë, por a mbajnë dot pallatet e vjetra një kat tjetër shtesë, kur janë projektuar me katet përkatëse?
Dhe ccështja e dytë, në këmbim të një kati shtesë, zhvilluesi paska për “detyrim” rregullimin e ndërtesës, pra një shpenzim qesharak në krahasim me fitimin që do të marrë nga kati shtesë.
Por pas gjithë kësaj fshihet një lojë e kryebashkiakut me ndërtuesit pranë tij, që pas kullave, të fitojnë sa më shumë edhe nga pallatet e vjetra, duke shtuar kate dhe ndërtimin në to, jo vetëm të apartamente, por edhe të lokaleve dhe ndërtime të tjera.
Dhe sigurisht që ashtu siç ndodh rëndom, tenderat do i fitojnë miqtë e “Rilindjes”.
