Vendi ku humbi jetën 48-vjeçari Kol Menga në Laç, njihet ndryshe si “Kodra e Bushit”, ndërsa nga banorët pohohet se është kthyer në një vend të mallkuar pasi brenda dy viteve ka marrë tre jetë.
Pas vdekjes së mësuesit me vajzën e tij para dy vitesh, mbrëmë gjatë natës rrjedhja e lumit ka marrë edhe tregtarin 48-vjeçar Menga.
Ai punonte prej disa vitesh në tregun e Laçit duke treguar rroba të përdorura, ndërsa mbrëmë, pasi filluan reshjet e dendura të shiut dhe rreziku ishte potencial që prurjet e përroit të përfshinin edhe biznesin e tij të vogël ai shkoi për të zhvendosur mallin.
Gjatë tentativës për të hequr mallin, 48-vjeçari është përpirë nga dallgët e përroit që kalon përmes qytetit.
Trupi i viktimës është gjetur 300 metra nga vendi ku e mori rrjedhja e lumit. 48-vjeçari Kol Menga ishte babai i dy fëmijëve.
