Kryetari i Partisë Demokratike Lulzim Basha ka akuzuar qeverinë se ka lënë në mëshirë të fatit banorët e përmbytur në Laç e Fushë Krujë. Në një deklaratë për mediat, Basha deklaron se ndërsa Edi Rama rreh gjoksin për suksese imagjinare, investimet e rilindjes bënë që me shiun e parë qytetet të përmbyten.
“Ndërkohë që Edi Rama rrihte gjoksin për suksese imagjinare, qindra familje të Laçit dhe Fushë Krujës u lanë në mëshirë të fatit. Këto janë investimet e rilindjes: me shiun e parë qytetet përmbyten, shtëpitë e bizneset po ashtu. Qytetaret janë braktisur nga kjo qeveri e papërgjegjshme që kujtohet për ta vetëm për t’ju marrë votën. Fatkeqësisht përmbytjet mbrëmë shkaktuan një tjetër viktimë, ashtu si edhe një vit më parë. Duke shprehur ngushëllimet për familjen e Kol Mengës që humbi jetën tragjikisht për shkak të përmbytjeve, i bej thirrje qeverisë të lerë propagandën dhe të marrë në dorë situatën për të ndalur çdo fatkeqësi tjetër dhe për t’ju ardhur në ndihmë banoreve të goditur”, deklaron kreu i PD.
