Arbana Osmani do të fillojë së shpejti ditëve të shtuna programin “Dua të të bëj të lumtur” në ekranin e Top Channel. Por Ermal Mamaqi ka një problem. Ai po ndien që tani “konkurrencën.”
Prej tri javësh tashmë, Ermali ka nisur të shtunave në Tv Klan programin “Xing me Ermalin”, për të cilin javë pas jave ka thyer rekordin… e vetes. Megjithatë, të shtunat e ardhshme, nuk duken të jenë kaq fatlume për Ermalin, saktësisht sapo të fillojë Arbana.
Kështu duket të paktën situata pas një minidialogu që Ermali dhe Arbana kanë shkëmbyer mes tyre në Instagram, sapo kjo e fundit ka postuar një foto ku ndodhet në Kishën Ortodokse, pas së cilës lajmëron edhe se shumë shpejt do të nisë programin e të shtunave: “Amon, vonohu dhe i çikë. Mos ma merr audiencën”, – shkruan me humorin që e karakterizon Ermali, por edhe Arbana ia kthen me të njëjtën monedhë: “Hahahahhaha, @ermalmamaqi s’e dinë këta që jemi bashkë këtu ne…” – shkruan ajo.
Nëse ka qenë pjesë e surprizës edhe Ermali, këtë nuk mund ta dimë, por ajo që pritet të ndodhë të shtunat e ardhshme, do të jetë pa dyshim një “konkurrencë e hapur” mes Ermalit dhe Arbanës.
