Gara presidenciale në Shtetet e Bashkuara merr një tjetër kthesë. “Washington Post” publikoi një video të regjistruar në vitin 2005 ku shihet Donald Trump duke bërë komente denigruese rreth grave.
Trump ishte duke folur me gazetarin Billy Bush të emisionit televiziv “Access Hollywood”, në një bisedë private, në prani të vetëm disa pak personave, në një autobus që po e çonte atë në emisionin televiziv. Trump ndërkohë kishte mikrofonin në trup.
Në regjistrim ai thotë: “Gratë e bukura më tërheqin menjëherë, si me magnet dhe filloj t’i puth. Nuk më pritet, i puth menjëherë”. Dhe më tej vazhdon: “Kur je i famshëm, ato të lënë të bësh ç’të duash”.
Trump vazhdon me komente të tjera vulgare se si u kërkon favore seksuale grave, duke folur në mënyrë shumë të hapur.
Pas publikimit, disa nga figurat kryesore të partisë, si kreu republikan i Dhomës së Përfaqësuesve, Paul Ryan, tha se ishte i neveritur nga ajo që kishte dëgjuar dhe se kandidati republikan nuk do të marrë pjesë në një konferencë të partisë të shtunën, ku ishte planifikuar të fliste.
Edhe figura të tjera të rëndësishme si kryetari i Komitetit Kombëtar Republikan, Reince Priebus, i dënuan komnentet.
Kandidati republikan për president Donald Trump kërkoi ndjesë pas publikimit të videos. “Kërkoj ndjesë në se dikush është ofenduar. Ato ishin biseda private, që ndodhën shumë vite më parë. Bill Clinton më ka thënë gjëra shumë më të shëmtuara në fushën e golfit, që as nuk u afrohen këtyre që kam thënë unë”, deklaroi Trump.
