Në takimin e parë të Edi Ramës me ricikluesit, një show me regji i organizuar për të mbrojtur ligjin për importin e plehrave teksa po përgatitej protesta e shoqërisë civile, spikati drejtoresha e “UET Enterprise” eksperte e mjedisit.
Ornela Çuçi (në të djathtë të fotos) ishte e vetmja joricikluese që e mbrojti ligjin në këtë takim. Ishte e vetmja ambientaliste që nga shfaqja kryeministrore po u thoshte ambientalistëve që i quante “miq”, se ata ishin të painformuar, ndaj po protestonin, shkruan Lapsi.al
“E para për miqtë e mi ambientalistë. Të gjithë energjinë që harxhojmë për protesta, le ta përdorim për të informuar këtë popull, i cili është ndoshta më i painformuari në rajon për manaxhimin e mbetjeve. Një shishe plastike kërkon 1000 vjet të dekompozohet. Nëse i groposim shishet e plastikës, niveli i ndotjes toksike në ujrat nëntokësore do të jetë i madh me pasojë ndotjen e florës dhe faunës në mjedisin ujor të vendit.”
Ky argumentim ka tërhequr jo vetëm vëmendjen e medias që e vuri në dukje duke e pasqyruar në mes të dhjetëra fjalimeve që u mbajtën. Pedagogia Çuçi ka tërhequr edhe vëmendjen e kryeministrit.
Pak ditë pas kësaj Rama e ka emëruar koordinatore të qeverisë për çështjen e importit të mbetjeve. Sigurisht me argumentimin e saj, që mund ta lexoni më poshtë, ajo e meriton plotësisht këtë pozicion.
“Vetëm në UET, ku unë punoj, prodhohen rreth 2000 shishe plastike në ditë. Këto mbetje duhen medoemos të riciklohen. Nëse kompanitë ricikluese sigurojnë vetëm 27.6% të lëndës së parë brenda vendit, atëherë ato do të mbyllen me siguri. Çfarë do të bëhet me shishet plastike dhe të gjitha mbetjet tona nëse nuk do të funksionojë kjo industri?”
Ne po i vijmë në ndihmë me një përgjigje të thjeshtë pyetjes që ngre ekspertja e mjedisit, se çfarë do të bëhet me shishet plastike të UET nëse mbyllet industria e riciklimit. Nëse këto industri do të mbyllen për shkak se nuk do të importojmë plehra, atëherë shishet e UET apo ato të kryeministrisë mund t’i paketojmë dhe t’i eksportojmë, ashtu siç po bën Europa në këtë rast duke i sjellë në Shqipëri.
Ndërsa shqetësimi i saj të dytë, që ia bëri vetë të ditur kryeministrit, nuk ka nevojë për koment:
“E dyta, z. Kryeministër, në çdo vend të zhvilluar të gjitha nismat e mëdha vendimmarrëse mbështeten fort në funksionimin e Helikës së Artë: Studim shkencor e akademi, Qeverisje lokale e qendrore dhe Biznes, por unë këtu do të shtoja edhe mediat të cilat kanë një detyrë të madhe, informimin. Nëse reformat tuaja nuk janë paraprirë nga studime të mirëfillta, për të cilat të informohet ky popull direkt, pa ngjyrime politike e partiake, gjithnjë ka për të pasur të tilla reagime frike”.
