Ish -gjyqtari, Subi Sulçe, që dënoi me vdekje dy poetët e Librazhdit, Vilson Blloshmi dhe Genc Leka u gjet i vdekur në banesën e tij.
Policia e Korçës ka njoftuar se trupi i pajetë u gjet të mërkurën nga familjarë, ndërkohë që ai kishte ndërruar jetë tre ditë para se ta gjenin. Vdekja, thuhet të ketë qenë natyrale, pasi në trupin e tij nuk janë konstatuar shenja që mund ta bëjnë ndërrimin e jetës të dyshimtë. Ai jetonte i vetëm në banesë. Subi Sulçe është një emër shumë i lakuar i lidhur me gjyqin e inskenuar ndaj dy poetëve të Librazhdit, Genc Lekes dhe Vilson Blloshmi, të cilët u dënuan me pushkatim. Më 13 korrik 1977, Subi Sulçe kryesoi seancën gjyqësore të mbajtur në kinemanë e qytetit të Librazhdit, ku për akuzën e fabrikuar të sabotazhit në ekonomi, u dënuan me vdekje poetët Genci Leka dhe Vilson Blloshmi.
