Autoritetet në Florida kanë lajmëruar banorët që të përgatiten për një “goditje të drejtpërdrejt”, pasi uragani “Matthew” shkatërroi pjesë të Haitit dhe kaloi në Bahamas.
Guvernatori i Shtetit është shprehur se dëmi mund të jetë katastrofik, ndërkohë që përgjatë bregdetit janë lëshuar urdhra për evakuim.
Sipas mediave amerikane, erërat e fuqishme të këtij uragani pritet të forcohen dhe të godasin Florida-n pasi kanë shkaktuar dëme masive përqark Karaibeve.
Uragani “Matthew” ka shkaktuar 22 viktima në Haiti, ndërsa mijëra të tjerë janë zhvendosur. Ky uragan, i cili është më i fuqishmi i Karaibeve në gati një dekadë, u bë shkak për shtyrjen e zgjedhjeve presidenciale në ishull.
Si pasojë e kësaj stuhie, kanë mbetur të vdekur edhe katër persona në Republikën Dominikane.
Rreth 2 milionë persona janë këshilluar të largohen nga zonat përqark bregdetit të Florida-s, Georgia-s dhe Karolinës Jugore, ndërkohë që edhe Karolina Veriore mund të preket nëse stuhia lëviz drejt veriut.
Mediat ndërkombëtare shkruajnë se, “në shumë zona të Florida-s, banorët janë vendosur në radhë për të furnizuar shtëpitë e tyre, ndërkohë që shumë shkolla e zyra qeveritare janë mbyllur”.
Gjithashtu edhe linja ajrore si “American Airlines” ka anuluar të gjithë shërbimet e saj në një prej tre aeroporteve në Florida-n Jugore. Ndërsa presidenti amerikan Barack Obama u ka bërë thirrje banorëve t’i marrin seriozisht paralajmërimet për largim.
