Shtatë nxënës të shkollës “Jashar Hoxha” janë dërguar me urgjencë në Qendrën Spitalore Universitare (QSUT) pas problemeve shëndetësore, ku dyshohet se janë helmuar.
Burime për “BalkanWeb” bëjnë të ditur se nxënësit e klasës së shtatë janë ndjerë keq, sapo kanë hyrë në shkollë, pasi pastruesja kishte përdorur acid për larjen e ambienteve të klasave.
Mësohet se pasi morën ndihmën e nevojshme në pavionin e Pediatrisë në QSUT, nxënësit u dërguan në shtëpi dhe janë në gjendje të mirë.
Në shkollë kanë mbërritur punonjës të shëndetësisë për të bërë matjen e nivelit të acidit në ambientet e shkollës.
Ndërkohë, burime nga QSUT nuk përjashtojnë mundësinë që nxënësit të jenë helmuar nga ushqimi, pasi kanë deklaruar se para se të ndiheshin keq kishin konsumuar patatina.
