Një krim i rëndë ka ndodhur mbrëmë, pak para mesnate, në Shkodër. Dy persona kanë humbur jetën dhe 4 të tjerë janë plagosur në Dajç. Mendohet se ngjarja ka ndodhur për arsye banale. Dyshimet e para janë se krimi ka lindur pas një konflikti banal mes autorit, viktimave dhe të plagosurve.
Sipas të dhënave, autorin e kanë ngacmuar, ai më pas ka marrë armën dhe ka hyrë në lokal. Të plagosurve iu dha ndihma e parë në spital, ndërkohë që policia rrethoi menjëherë vendngjarjen. Sipas burimeve policore, të plagosurit janë Vinçens Kopshti, 26 vjeç, Aleks Prendi, 40 vjeç, Ndok Marku, 35 vjeç dhe Kitas Molla, 26 vjeç. Mësohet se autori i dyshuar, Miklovan Parubi i ka qëlluar të gjithë këta persona me breshëri kallashnikovi.
Të paktën deri në mesnatë autori i ngjarjes nuk ishte arrestuar. Sipas mjekëve të gjithë të plagosurit janë jashtë rrezikut për jetën. Pas zënkës me fjalë, autori ka shkuar në shtëpi, ka marrë armën dhe është kthyer në lokal e i ka qëlluar viktimat.
Besohet se ai kishte njohje të mëparshme me ta. Burimet thanë se i dyshuari ngacmohej nga banorët e fshatit. Forca të shumta të policisë dhe Forcat e Ndërhyrjes së Shpejtë rrethuan zonën e Dajçit në kërkim të Parubit.
