Ish-deputeti i PD-së Besnik Mustafaj ka folur për “Dritare me Rudinën” në Vizion Plus, lidhur me ndërtimin e HEC-eve në Valbonë.
Nëse Valbonës i zhduket lumi, atëherë çfarë do i mbetet? -u shpreh Mustafaj. 11 hidrocentrale në 20 km lumë, do ta zhdukin praktikisht lumin.
Lumenj të vdekur ka edhe në shkretëtirë, po për çfarë duhen, për çfarë mund t’i përdorësh? Askush nuk shkon t’i shohë.
Hidrocentral pa ujë nuk punon, kështu që ai ka për të marrë ujë nga lumi. Ai do të bëjë që të vdesë lumi. Normal që kompania do mbrojë projektin e vet, por me çfarë do t’i venë turbinat në punë, me ajër?! Do të thahet shtrati i lumit.
Unë nuk flas si djalë i Tropojës, e nuk flas për vendimet e qeverisë së Berishës. Po flas për Valbonën e të gjithëve.
Në një gjatësi prej 20 km ku do të bëhen ndërtimet e hidrocentraleve, çfarë do të ndodhë me Valbonën? Sigurisht që ka disa parametra teknikë, se sa përqind do të merret, e sa përqind ujë do të lihet, por Valbona nuk është Lumi i Drinit. Valbona nuk mund të përdoret kështu. Valbona nuk duhet dhunuar.
Të arrish nga 3500 në 40 mijë turistë, për shkak të asaj Valbone dhe tani të thuash dua të bëj hidrocentrale?! Po pse duhet ta vizitojnë njerëzit tani, për hidrocentralet? Turistët nuk do të shkojnë për të parë një luginë të tharë dhe një lumë të vdekur. Ata thjesht nuk do të shkojnë më -u shpreh Besnik Mustafaj./dritare.net
