Policia italiane ka rikuperuar dy piktura të Van Gogh të vjedhura nga një muze në Amsterdam më 7 dhjetor 2002.
Bëhet fjalë për pikturat “Plazhi i Scheveningen”, e vitit 1882 që vlerësohet si e paçmueshme dhe “Dalja nga Kisha protestante e Nuenen”, e vitit 1884.
Muzeu Van Gogh kishte vënë si shpërblim 100 mijë euro për këdo që jepte informacion për pikturat e vjedhura.
Plazhi i Scheveningen
Në ambientet e hetuesve kishte prej kohësh zëra për një “investim” të bërë nga Camorra në dy pikturat.
Sipas zyrtarëve të këtij muzeu pikturat janë gjetur pas një hetimi masiv nga prokuroria italiane dhe zyrtarët kundër krimit të organizuar.
Piktura “Dalja nga Kisha protestante e Nuenen”
Autoritetet italiane kanë konfirmuar rikuperimin e dy pikturave të piktorit të famshëm, të cilat sipas tyre ishin në posedim të mafias napolitane.
Raportohet se ato kanë qenë midis aseteve me vlerë miliona euro që i janë sekuestruar grupit të Camorras.
Zyrtarët e muzeut në Amsterdam nuk bëjnë të ditur nëse pikturat do t’u rikthehen atyre, por konfirmuan se ato ishin në gjendje të mirë.
Sipas tyre, këto dy piktura vlejnë plot 100 milionë euro.
Ishte agimi i 7 dhjetorit 2002 kur hajdutët arritën të hynin në muzeun e blinduar të Van Gogh në Amsterdam duke vjedhur dy pikturat. Ata u larguan më pas në Napoli, ku përfunduan në qendër të hetimeve të Guardia di Finanza.
