Ish-kryeministri Sali Berisha ka deklaruar sot mbështetjen e tij për protestën e shoqërisë civile që do të zhvillohet nesër në orën 11 të paradites kundër ligjit të importit të mbetjeve në Shqipëri.
Ish-kryeministri u ka bërë thirrje që të gjithë qytetarët, pa dallim bindjeve politike të dalin e të protestojnë kundër ligjit të plehrave.
Ja çfarë shkruan Berisha në Facebook:
Bashkohuni me protestën!!
Të dashur miq, nesër në ora 11:00 protesta qytetare e thirrur nga Shoqëria civile.
Kjo është:
– Protestë për mbrojtjen e jetës, shëndetit të fëmijëve dhe qytetarëve shqiptare nga miliona ton plehra dhe helme që Edi Rama, pasi ka marrë 4 milionë euro, ka vendosur të importojë në Shqipëri.
– Proteste kundër njeriut që tre vjet më parë në fushatë elektorale shpalli importin e plehrave si akt tradhtie kombëtare dhe sapo erdhi në pushtet abrogoi ligjin përkatës. Në këtë aspekt, protesta e nesërme është protestë e të gjithë njerëzve të qytetëruar që nuk pranojnë kurrë të mashtrohen sikur të ishin qenie primitive nga kreu i qeverisë së tyre.
– Protestë ndaj kryeministrit, që pasi ka mashtruar në mënyrë të paskrupullt tallet në qytetarët dhe intelektin e tyre duke ju thënë me cinizëm se mbeturinat që hidhni çdo ditë në kazanët e plehrave nuk janë plehra!
– Protestë që të rikthejmë referendumin, të cilin Edi Rama, duke shkelmuar mbi firmat e 60 mijë qytetarëve e shkelmoi si të panevojshëm dhe tani kërkon që ta pengojë përsëri.
Protestën e thërret shoqëria civile, por në interesin e çdo qytetari pavarësisht nga bindjet politike. Mbështetja juaj qytetare është jetike për suksesin e saj!
