Fatos Lushi, oficeri gjyqësor që u kap ‘mat’ në video-skandalin korruptiv duke numëruar 18 mijë euro që do të shkonin për Prokurorin e Tiranës, Ardian Braho nuk është një personazh i panjohur për politikën.
“BalkanWeb” ka mësuar se Lushi është një nga miqtë më të afërt të deputetit të LSI-së në Qarkun e Kukësit, Ylli Shehu. Miqësinë mes tyre, e cila duket se është edhe familjare, ata nuk ngurojnë ta ndajnë edhe në publik. “BalkanWeb” ka siguruar disa foto ku oficeri gjyqësor i akuzuar për korrupsion shihet në shoqërinë e deputetit të LSI-së dhe të babait të tij.
Lushi ka qenë edhe në shtëpinë e ligjvënësit në Kukës për shkak se nga fotot e siguruara nga “BalkanWeb” ai shihet teksa përqafon babanë e deputetit si edhe këndon me çifteli në shtëpinë e tij.
Madje duket se Lushi dhe deputeti i LSI-së, Ylli Shehu ndajnë edhe të njëjtin pasion për muzikën. Kjo për shkak se oficeri gjyqësor nuk ka ngurruar të fotografohet duke luajtur në organo dhe duke kënduar në studio muzikore. Pasionin për muzikën as deputeti Ylli Shehu nuk e ka fshehur. Në një intervistë të dhënë pak kohë më parë ai ka pohuar se “mendoj se është e drejta universale e gjithkujt që të japë më të mirën e tij në art, muzikë apo kudo, pavarësisht statusit që ka. Nuk ka asnjë kod ligjor apo moral që të më pengojë që përkrah punës si deputet të këndoj”, – ka thënë ai.
I kontaktuar nga “BalkanWeb”, deputeti i LSI-së, Ylli Shehu nuk ka preferuar të japë asnjë koment lidhur me skandalin ku është përfshirë Lushi. Shehu u zgjodh për herë deputet në Qarkun e Kukësit në vitin 2013 me siglën e Partisë Republikane, por në vitin 2015 ai vendosi të kalojë tek grupi parlamentar i LSI-së.
Fatos Lushi, oficeri gjyqësor që u kap ‘mat’ në video-skandalin korruptiv duke numëruar 18 mijë euro që do të shkonin për Prokurorin e Tiranës është ende në kërkim nga policia. Prokuroria e Krimeve të Rënda fill pas publikimit të videos nxorri ndaj tij një urdhër arresti pasi dyshon se Lushi ka konsumuar veprat penale të korrupsionit, shpërdorimit të detyrës dhe ndikimit të paligjshëm në një proces hetimor. /Balkanweb/
