Championsi ia lë sot vendin Europa League dhe në fushë do të ketë sërish shqiptarë, madje titullarë të rëndësishëm për klubet e tyre.
Të paktën tre nga kuqezinjtë tanë do të jenë titullarë mbrëmjen e sotme, duke sfiduar skuadra me emër në futbollin europian.
Lajmi i mirë është rikthimi i goleadorit Armando Sadiku, i cili sot luan me Zyrihun e tij ndaj turqve të Osmanlispor.
Në ndeshjen e parë në grup sulmuesi kuqezi arriti të shënonte golin e parë në Europa League në fushën e Vilarealit, që më pas e përmbysi rezultatin.
Po ashtu, titullar me Zurihun pritet të jetë edhe Burim Kukeli, një tjetër kuqezi.
Kapiteni i Kombëtares së Shqipërisë, Ansi Agolli, ka sot një transfertë shumë të vështirë në Firence me Fiorentinën. Mbrojtësi i krahut të majtë është një titullar i padiskutueshëm te Qarabagu, edhe pse vitet kalojnë.
