Kërcënimi ndaj kryeprokurorit Adriatik Llalla ka shqetësuar deputetët e PS, Xhemal Qefalia dhe Arben Çuko. Përmes një letre drejtuar kreut të komisionit të sigurisë, Spartak Braho, deputetët kanë kërkuar një seancë dëgjimore me kryeprokurorin nga ky komision.
“Në gjykimin tonë, kjo përbën një ngjarje të rëndë që cenon sigurinë kombëtare dhe minon besimin e cdo qytetari për sigurinë publike dhe kërkon vëmendje maksimale nga të gjitha institucionet vendimarrëse e ato ligjzbatuese, shkruhet në kërkesën e dy deputetëve.
Përveç Kryeprokurorit, dy anëtarët e komisionit të sigurisë kanë kërkuar që në seancë të jenë të pranishëm edhe kreu i SHISH, Visho Ajazi Lika dhe drejtori i pqërgjithshëm i policisë, Haki Çako.
Në kërkesën zyrtare të siguruar nga Ora News, kreu i komisionit të sigurisë, Spartak Braho i është përgjigjur deputetëve se seanca dëgjimore mund të thirret vetëm sipas rregullores së parlamentit bazuar në nenin 36 pika 1 të saj. në këtë pikë thuhet se seancat dëgjimore me përfaqësues të lartë të institucioneve shtetëoren mbahen kur 1.3 e gjithë anëtarëve të komisionit të sigurisë ta kërkojë në mënyrë të motivuar me shkrim.
Dje Llalla u shfaq në Korçë ndërkohë burime në prokurori bënë me dije se nga verifikimi i numrit të kërcënuesit, të dhënat e poseduesit të kësaj karte telefoni figurojnë fiktive dhe se konfirmohet se ajo është blerë në tregun e zi.
Të njëjtat burime shtuan se në mesazh, kërcënuesi i ka përmendur Kryeprokurorit familjen dhe fëmijët. Për këtë arsye, ai ka njoftuar presidentin, kreun e SHISH-it, komandantin e Gardës dhe drejtorin e Përgjithshëm të Policisë së shtetit.
Në vijim të masave për të evituar çdo rrezik, familja e kreut të organit të akuzës, është vendosur në një vend të BE.
Kjo ngjarje që po hetohet nga Prokuroria e Krimeve të Rënda ka ndodhur në muajin qershor, dhe u be publike pak ditë më parë./Ora News
