Deputeti i Partisë Socialiste në Shqipëri, Eduart Ndocaj i njohur si “Kaubojsi” është rrahur dy net më parë në Landovicë të Prizrenit.
Vetë Ndocaj e mohoi rrahjen, por sipas Prokurorisë së Prizrenit, incidenti ka ndodhur në orët e hershme të mëngjesit të së shtunës.
Rastin për “Klan Kosovën” e ka konfirmuar Kryeprokurori i Prokurorisë Themelore të Prizrenit, Sylë Hoxha.
Ai ka thënë se sulmi është kryer nga dy persona, njëri shtetas i Kosovës ndërsa tjetri shtetas i Shqipërisë.
Që të dy janë arrestuar dhe janë nën masën e ndalimit policor.
Ndërkohë që Kryeprokurori Hoxha, ka thënë se kanë kërkuar që të dy personave t’u caktohet masa e paraburgimit.
Sipas Hoxhës, personi që ka sulmuar deputetin shqiptar e që është nga Kosova, është i njohur për autoritetet në Prizren.
