Sërish Taulanti përballë Granitit. Pas duelit Shqipëri-Zvicër në Euro 2016, dy vëllezërit Xhaka do të sfidojnë përsëri njëri-tjetrin.
Nesër në Londër luhet Arsenal-Basel sfidë e vlefshme për grupin A të Uefa Champions League.
Nga njëra anë qëndron Graniti vëllai i vogël i familjes Xhaka i cili këtë verë u transferua te Arsenali për 45 milionë Euro. Në krahun tjetër është Taulanti, mesfushori 25-vjeccar i kombëtares shqiptare i cili luan me skuadrën e parë të Baselit që prej vitit 2010.
Përballjes si kundërshtarë mes dy vëllezërve Xhaka i ka kushtuar një rëndësi te veçantë edhe sajti zyrtar i Uefa-s. Qeveria e futbollit europian thekson se dueli mes dy vëllezërve në Emirates Stadium nuk duhet humbur.
Taulant Xhaka ndërkohë në një intervistë për mediat ka theksuar se po pret me padurim momentin për të sfiduar sërish vëllain e tij të vogël. ”Do të jetë një ndeshje speciale nënvizoi, mesfushori i kombëtares kuqezi, të dy do të japim maksimumin në fushë për të fituar”.
