Banka BKT-së në bllok që u grabit para një muaji ka informuar grupin hetimor se paratë nuk kanë qenë të regjistruar në regjistrat me numër serie apo ndonjë shenjë tjetër dalluese që prokuroria ta konfirmojë burimin e këtyre të ardhurave të Robert Kullës.
Ndërkohë prokuroria po mban të bllokuara prej më shumë se një muaji paratë që iu sekuestruan Kullës, një prej personave të dyshuar për grabitjen e BKT Bank në zonën e ish bllokut. Por bllokimi i 16 mijë dollarëve dhe gati 4 mijë eurove duket i kotë.
Robert Kulla ka pretenduar se ne ditën kur është grabitur banka, ai nuk ka qene ne Tiranë. Paratë që iu gjetën ne banesë, ai ka thënë se i ka nga qiratë e tri objekteve në pronësi të tij. Kulla është lënë në masën e arrestit 30 ditë burg. Dega e BKT Bank në zonën e ish Bllokut u grabit më 8 gusht, ku autorët mundën të merrnin rreth 200 milion lekë të vjetra. Grabitësit hynë në ambientet e një bodrumi që më parë ka shërbyer si lokal, duke thyer një dritare të vogël. Policia arrestoi tre persona Roland Liti, Alan Babamato dhe Robert Kullën.
