Një përplasje brenda mureve të institucionit të Teatrit të Kukullave është bërë publik dhe nuk dihet sa do të vazhdojë. Monika Lubonja, Drejtorja e këtij Teatri deklaroi hapur të premten urrejtjen që ka për aktoren e njohur të Teatrit të Kukullave, Shegushe Bebeti.
E ftuar në “Zonë e Lirë”, Drejtoresha e skenës së fëmijëve teksa iu përgjigj pyetjes së Çanit, se cilën nga aktoret do të zhdukte nga teatri, ajo iu përgjigj me plot gojën: Shegushe Bebeti.
Edhe pse për ta zbutur situatën, ajo pranoi se si aktore, vartësja e saj është mjaft e mire.
Mbi deklaratën reagoi dhe aktorja e qindra roleve të Teatrit të Kukullave:
Bebeti: “Të them të drejtën nuk jam aspak e frikësuar nga deklaratat e papërgjegjshme të titullares, sepse unë e kam bërë karrierën me talent, përkushtim dhe punë të palodhur. Edhe pse për momentin shtanga kur më thanë, pasi e pashë në ritransmetim thashë me vete që zoti i rregullon gjërat me dorë. Duhej të dilte publikisht që publiku ta njohë dhe ta kuptojë se kush e drejton institucionin më të rëndësishëm në edukimin e fëmijëve, Teatrin e Kukullave. Mjerim!”
Mosmarrëveshjet mes aktores dhe Drejtoreshës kanë ekzistuar që prej ardhjes në krye të Lubonjës në Teatrin e Kukullave.
Por, tashmë sulmi mori përmasa publike.
Pjesë e intervistës te “Zonë e Lirë”:
Monika Lubonja, në një jetë tjetër, cilën nga koleget e tua do doje ta zhdukje nga qarkullimi?
Ah sa kam unë, po… Ata që janë intrigantë dhe mosmirënjohës.
Kjo s’do të thotë asgjë. Është një gjë e drunjtë që e përdorin politikanët…
Jo, jo, s’ka lidhje. Lëri politikanët, se nuk marr vesh fare nga politika. Ta them një emër. Ta marr guximin ta them një emër? Lëre se s’po e them se do më hidhen se i kam dhe në punë. E kuptojnë vetë ata.
A janë njerëz të panjohur?
Jo, janë njerëz të njohur. Unë flas për njerëz të njohur publikisht.
Thuaje, thuaje…
Ta them? Shegushe Bebeti.
Një sekondë tani, ky është emër i dëgjuar për mua. Po kjo zonja është aktore tek Teatri i Kukullave. Dale një sekondë tani, ti je drejtoreshë, pse nuk e heq?
Nuk e heq, sepse është “Mjeshtre e Madhe e Punës”. Po ndërkohë ti nuk e do? Unë mund të mos e dua, por është aktore e mirë. Do luajë, do interpretojë. Nuk ka rëndësi.
