Drejtoresha e Përgjithshme e Tatimeve Briseida Shehaj dha dorëheqjen dy ditë më parë, pasi i është propozuar një post më i lartë. Kryeministri Edi Rama ua besoi për të disatën herë mbledhjen e parave për buxhetin e shtetit dy zonjave. Drejtoria e Përgjithshme e Tatimeve dhe ajo e Doganave do të drejtohen nga Vasilika Vjero dhe Bejla Ikonomi, pas largimit të Briseida Shehajt dhe Pranvera Fagut.
Në një prononcim për “Gazetën Shqiptare”, Shehaj shpjegon faktin se pse vendosi të largohet nga Drejtoreshë e Përgjithshme e Tatimeve pasi e mbajti për më shumë se tre vjet këtë detyrë. “Kryeministri ynë është njeri i surprizave. Mora propozimin për një detyrë më të mirë dhe dhashë dorëheqjen nga Drejtoria e Tatimeve. Akoma nuk e kam marrë me shkrimin vendimin për emërim në detyrën e re. Motivi i largimit nga Tatimet është sigurisht detyra e re, që është më e mirë”, – tha Shehaj. Ndërkohë që, ndryshimet e drejtuesve të tjerë kanë qenë surprizë jo vetëm për ata që do të lënë detyrën, por edhe për ata që do ta marrin. Ndërkohë zëvendësministrja e Financave, Irena Beqiri shkon këshilltare pranë kryeministrit Rama. Ndërsa Genc Mete është emëruar zv.ministër te Ministria e Financave.
