Një aksident rrugor ka ndodhur mbrëmjen e sotme në aksin nacional Korçë-Pogradec, ku është plagosur rëndë një i ri.
Sipas të dhënave të para, në këtë aksident rrugor janë përplasur dy mjete, kamioni me targë “KO 7579 B” dhe automjeti tip “Mercedes-Benz”, me targë “AA 722 NA”, ku udhëtonte 21-vjeçari.
Redi Talka, 21 vjeç, ka qenë duke u kthyer nga Pogradeci, ku kishte çuar dajën e tij për një dasmë, kur është aksidentuar në fshatin Sovjan.
Ai ndodhet në gjendje të rëndë shëndetësore dhe është dërguar në Spitalin e Korçës. Burime nga vendi i ngjarjes thonë se gjithçka ka ndodhur në afërsi të një pike karburanti, ku kamioni i drejtuar nga shtetasi me inicialet I.S., 50 vjeç ka qenë duke ecur mbrapa kur “Benzi” është përplasur me të e për pasojë ka dalë nga rruga.
