Jose Mourinho dhe Arsene Wenger. Të dy konsiderohen armiq dhe shkëndijat në të kaluarën mes tyre kanë qenë të shumta, me “Daily Mail” që zbulon edhe një deklaratë shumë të fortë të Mourinhos në drejtim të homologut të tij francez.
Janar 2014: Chelsea është afër shitjes së Juan Mata te Manchester United. Arsenal-i, që duhet të përballet me “Djajtë e Kuq”, nuk është i kënaqur dhe Arsene Wenger akuzon Mourinho-n se ka frikë.
Përgjigja e “Special One” është bërë e famshme, me Wenger që është përkufizuar si “specialisti i dështimeve”.
Por, në një libër të gazetarit Rob Beasley, është zbuluar një tjetër thënie e famshme e Mourinho-s për Wenger, akoma më e rëndë.
“Kur Wenger kritikon Chelsea-in dhe Manchester United për transferimin e Mata-s… një ditë do ta gjej jashtë një fushe futbolli dhe do t’ia thyej turinjtë”, mësohet të ketë thënë Mourinho. Por “Special One” është hakmarrë disa muaj më vonë në fushë. 22 mars 2014, ndeshja e 1000 e Wenger si trajner: Chelsea mund Arsenal-in 6-0. Më shumë se një grusht në fytyrë…
Por historia nuk mbaron këtu. 5 tetor 2014: Chelsea-Arsenal 2-0, ndeshja është bërë e famshme për sherrin që pothuajse ka nisur buzë fushës mes dy trajnerëve. Vetë “Special One” i ka rrëfyer Beasley-it: “Wenger kërkonte një karton të kuq dhe po bënte presion ndaj arbitrit në zonën time. Unë i thashë të kthehej në vendin e tij. Më ka shtyrë, unë kam shtyrë atë dhe i kam thënë: ‘bën kështu sepse e di që këtu unë nuk mund të reagoj, por një ditë, herët ose vonë, do të takoj në rrugë’”.
Në atë kohë, Beasley zgjodhi të mos e publikonte këtë përgjigje të Mourinho-s, që tani është përfshirë në librin e tij, disa pjesë të të cilit janë publikuar nga “Daily Mail”, shkruan Gazzetta dello Sport.
