Ideja për t’i emërtuar kazanët e plehrave me emrat e deputetëve socialistë ishte e Ben Blushit. Fjalimin në parlament, Blushi e mbylli thirrjen që u mirëprit nga protestuesit. Të enjten në mbrëmje, sapo mbaroi seanca në parlament dy kazanë plehrash u pagëzuan me emrat e Edi Ramës dhe Eduart Shalsit.
Fotot u shpërndanë në rrjetet sociale. Të nesërmen emrat e deputetëve socialistë ishin kudo nëpër kazanët e Tiranës. Mesa duket kjo ka shkaktuar pakënaqësi në rradhët e 63 deputetëve socialistë, që nuk e menduan këtë kur votuan ligjin për importin e plehrave. Dy protestues u shoqëruan natën nga policia.
Punonjës të Bashkisë së Tiranës u urdhëruan të fshijnë emrat e të zgjedhurve të PS nga kazanët e plehrave, por fotot ishin shpërndarë tashmë në rrjetet sociale. Foto e publikuar në portalet qeveritare duket se është porositur në shenjë hakmarrjeje për Blushin, ideja e të cilit ishte për të protestuar kundër deputetëve, që e ngritën kartonin për t’u ulur në nivelin e mbetjeve, që kishin refuzuar me përbuzje tre vite më parë.
