Debutim me kontraste për portierin e Kombëtares Shqiptare, Thomas Strakosha në Serinë A. Paraqitja e tij pozitive në ndeshjen e “San Siros” kundër Milanit u eklipsua nga humbja e Lazios.
Por edhe pse Lazio humbi me dy gola kundër Milanit, Strakosha plotësoi pritshmëritë e stafit drejtues edhe pse emocionet në një mbrëmje të tillë ishin të mëdha.
“Jam shumë i kënaqur për debutimin por rëndësi kishte rezultati dhe nuk jam i lumtur për shkak të humbjes. Falënderoj trajnerin dhe klubin që kanë besuar tek unë. Ishte një ndeshje shumë emocionuese or kur humbet të mbetet një shije e keqe. Duhet të vazhdoj të punoj dhe të shikoj përpara me besim. Inzaghi ka shumë pasion, por ne gabuam shumë edhe pse kam besim te ekipi. Fola me familjen time përpara ndeshjes dhe ishin që të gjithë shumë të lumtur”, tha 21-vjeçari.
Edhe pse shumë kilometra larg, Foto Strakosha e ka përjetuar debutimin e të birit me emocione dhe krenari. Portieri i Lazios rrëfen më tej një moment interesant.
“Komunikova me të në telefon dhe mund të them që ishte më i stresuar se sa në periudhën kur luante vetë. Mund të them se kam kaluar momente shumë të vështira në aspektin psikologjik dhe kjo ishte ndeshja më e vështirë për mua. Tani duhet të shijojmë përpara dhe nuk ka aspak rëndësi nëse konsiderohem portier i dytë apo i tretë. Unë jam i fokusuar te stërvitja dhe dua të bëj një rrugë të gjatë në të ardhmen”, tha portieri lacial.
Si për ironi të fatit, ishte largimi i Etrit Berishës nga Lazio që krijoi kushtet e duhura për debutimin e Strakoshës te Lazio.
