Kreu i opozitës, Lulzim Basha ka reaguar pasditen e sotme për largimin nga vendi të kompanisë që drejtohet nga biznesmeni libanez, Fadi Mitri, i cili u dhunua barbarisht 10 ditë më parë nga 3 persona në rrugën e Rinasit.
Ditën e sotme, kompania Omnyx e biznesmenit libanez njoftoi se do tërheqë investimet e saj nga Shqipëria.
Ndërsa kryetari i Partisë Demokratike, Lulzim Basha, e cilësoi largimin e kësaj kompanie si një tjetër lajm i keq për vendin tonë. Basha tha se “krimi, trafikantët dhe banditët ia dolën ta mbajnë të tyre zhvillimin dhe Shqipërinë”.
“Edi Rama hesht sepse Shqipëria i duhet e varfër dhe e papunë, pasi e ka më të lehtë ta sundojë me banda e trafikantë. Largimi i Omnix është tjetër lajm i keq për vendin tonë. Lajm i keq për shqiptarët dhe kompanitë e huaja që largohen nga viti në vit. Krimi, trafikantët dhe banditët ia dolën ta mbajnë të tyre zhvillimin dhe Shqipërinë. Shqipëria e varfër, me drogë janë e vetmja mundësi që Rama të qëndrojë në pushtet. Edi Rama ka dëshmuar se jep siguri dhe garanci vetëm për krimin dhe bandat, por jo për investitorët vendas apo të huaj”, deklaroi Basha në një deklaratë për shtyp.
“Shqipëria nuk mund dhe nuk duhet të jetë peng i Edi Ramës dhe kartelit të tij kriminal”, e mbylli Basha deklaratën e tij.
