Gjykata e Shkodrës ka dhënë masën e sigurisë “arrest me burg” për 31-vjeçarin Luigj Bludaj, që akuzohet për vrasjen e kushëririt të tij Gjok Arra më 15 shtator në fshatin Gjuraj të Dukagjinit. Ndërkohë që vëllai i tij, Çesk Bludaj është ende në kërkim.
Vrasja pati si motiv konfliktin për kultivimin e kanabisit mes familjeve Arra dhe Bludaj kishte nisur një muaj më parë, për parcela të mbjella me kanabis në tokë pa pronar.
Gjok Arra, i cili u vra me armë zjarri nga vëllezërit Bludaj, dyshohet se kishte kryer një investim prej 80 mijë eurosh, në një prej këtyre parcelave në zonat e thella të Dukagjinit. Kjo kishte hapur debate mes palëve, madje 30-vjeçari Arra i kishte akuzuar vëllezërit Bludaj se e kishin denoncuar atë në polici, gjë që solli edhe asgjësimin e disa parcelave të tij, në afërsi të fshatit Gjuraj ku dhe ata jetonin.
Në të njëjtën kohë, edhe vëllezërit Luigj Bludaj e Çesk Bludaj, kishin akuzuar Gjok Arrën për vjedhje të rrënjëve të kanabisit në parcelat e tyre. Këto përplasje sollën edhe vrasjen 30-vjeçarit. Një prej vëllezërve, Luigj Bludaj u dorëzua një ditë pas krimit, pas negociatave me policinë.
