Kryetari Kuvendit, Ilir Meta deklaroi sot nga Korça se “e vetmja garë që merr pjesë është ajo e kryetarit të LSI-së”, ndërsa lidhur me çështjen e zgjedhjes së Presidentit ai u shpreh se “nuk komenton gara të pashpallura”.
Ishte ministri Ditmir Bushati ai që tha në një intervistë televizive se Meta është një kandidat i fortë për President.
Lidhur me reformën në drejtësi, Meta tha se nuk do lodhet duke kërkuar konsensusin. “Shoh që rruga po shkon mjaft mirë dhe palët janë duke gjetur gjuhën e përbashkët, uroj që kjo të ndodh sa më shpejtë. Unë kam kërkuar dhe kërkoj konsensusin”, tha Meta.
Përsa i përket kultivimit të kanabist, një temë që është kthyer në problematikën kryesore të përplasjes PD-PS, Meta tha se politika duhet të marrë një vendim.
“E ardhmja e Shqipërisë është turizmi dhe bujqësia e jo Cannabisi. Politika duhet të marrë një vendim e nuk duhet t’i shmanget, dhe jo vetëm politika por dhe partnerët ndërkombëtarë, që janë të interesuar për të ardhmen e vendit, si një vend kandidat për BE”, tha në përfundim ai.
