Kur zgjedhjet e ardhshme parlamentare janë larg gati 9 muaj, Kryeministri Edi Rama ka nisur një komunikim të përjavshëm me qytetarët përmes rrjeteve sociale.
Në këtë rubrikë të re të Kryeministrit, që do të jetë çdo të diel në orën 17:00, Rama ka bërë një analizë për zgjedhjet në Dibër. Kreu i PSsë tha se opozita nuk ofroi asnjë alternativë për qytetarët e Dibrës. Ai shton se përveç “një pakice të lëkundur që vazhdon t’i besojë PDsë sy mbyllur, shumica dërrmuese nuk kishte arsye të dëgjonte ato daulle dhe Dibra këtë tha me votën e saj”. “Dibra kishte një zgjedhje të qartë mes një kandidati që doli nga komuniteti dhe një kandidati tjetër që u transportua nga Tirana, më saktë nga SHQUPi, madje në prag pensioni, që do të mbetet i pari dhe i fundit kandidat në historinë e përbotshme të zgjedhjeve që nuk votoi as për veten e tij, sepse nuk ishte i regjistruar”, shprehet Rama. Kryeministri nga një anë pranon se qeveria e tij nuk është e pakritikueshme dhe thekson se “Dibra i ka dhënë mend gjithë Shqipërisë me votën e saj”, duke iu referuar kështu fitores së koalicionit të tij me mbi 4 mijë vota diferencë. Në fund, Rama tha se mesazhi që ai ka marrë nga zgjedhjet në Dibër ishte “besim i madh për të bërë më tepër”. “Dhe ne do të bëjmë për Dibrën më shumë se ç’bënë të tjerët në 20 e ca vite së bashku”, përfundon Rama
