Zyrtarët më të lartë të 27 vendeve anëtare të BE-së, janë mbledhur sot në Bratisllavë pa përfaqësuesit e Britanisë, për ta përpiluar planin, i cili do të miratohet në samitin e ardhshëm në mars të vitit 2017, që përputhet me 60-vjetorin e Marrëveshjes së Romës.
Kancelarja gjermane, Angela Merkel, duke folur para të pranishmëve tha se BE-ja është në situatë kritike. Robert Fico, kryeministër i Sllovakisë, që aktualisht e kryeson presidencën e radhës së BE-së, tha se liderët të gjithë dëshirojnë të shohin unitet, por ka tërhequr vërejtjen se kjo nuk do të jetë punë e lehtë.
Liderët e Bashkimit Evropian mbeten thellësisht të përçarë lidhur me krizën më të madhe prej Luftës së Dytë Botërore, atë të migrantëve. BE-ja, po ashtu, është duke u përpjekur për ripërtëritje pas sulmeve vdekjeprurëse terroriste dhe vendimin e Britanisë për largim nga BE-ja.
Pritet që liderët do të diskutojnë për bashkëpunim më të afërt në fushë të mbrojtjes, për rritjen e sigurisë në kufijtë e jashtëm të BE-së dhe shtimin e kapacitetit të një fondi investues të Bashkimit Evropian, me qëllim që të krijohen vende të reja të punës dhe rritje ekonomike.
Presidenti i Bashkimit Evropian, Donald Tusk, para samitit në Bratisllavë, ka thënë se liderët duhet “të jenë të kthjellët dhe në mënyrë të sinqertë ta vlerësojnë situatën”. /Rel/
