Që prej ditës së hënë Kryetari i Kuvendit, Ilir Meta, ka nisur një vizitë zyrtare parlamentare në Mbretërinë e Bashkuar, shoqëruar nga Arta Dade, Kryetare e Komisionit të Punëve të Jashtme. Qëllimi i kësaj vizite zyrtare sipas njoftimit zyrtar të Kuvendit, është krijimi i Grupit të Miqësisë me Shqipërinë në Parlamentin Britanik.
Grupi homolog në Shqipëri drejtohet nga deputeti Ben Blushi, gjë që mund të konfirmohet edhe nga faqja zyrtare e Kuvendit. Edhe pse ishte i ftuar Blushi ka munguar në këtë vizitë të Kuvendit në Mbretërinë e Bashkuar. Për këtë çështje, Shqiptarja.com pyeti zyrtarisht Kuvendin e Shqipërisë nëse ishte ftuar apo jo deputeti Blushi për të qenë pjesë e delegacionit. “Po, – thanë burimet zyrtare të Kuvendit, – ishte i ftuar dhe kishte konfirmuar pjesëmarrjen e tij. Madje qenia e tij si pjesë e delegacionit ishte konfirmuar edhe nga pala britanike. Ai e anuloi pjesëmarrjen në delegacion në momentin e fundit dhe e argumentoi këtë me një problem personal”. Vetë deputeti Blushi nuk ka dhënë sqarime pse e anuloi pjesëmarrjen në këtë vizitë.
