Ish-kryeministri Sali Berisha gjatë fjalës së tij në Kuvend nuk ka folur vetëm për çështjen e drogës, por edhe për ARMON dhe Bankes.
Ai është rikthyer edhe njëherë çështjes së ARMO-s, ku akuzoi kryeministrin se ia ka dhuruar rafinerinë e Ballshit, pronarit të kompleksit “Taivan”, Besnik Sula, në mënyrë të paligjshme.
“A e dini ju që 8 muaj më parë kam denoncuar kryemafiozin Besnik Sula se ka kërcënuar me jetë miliardierë të huaj se treguan interes për rafinerinë e Ballshit? A e dini përgjigjen që dha zotëria? Pse, ministri i Brendshëm jam unë? Rama i dha familjarisht Besnik Sulës, rafinerinë e Ballshit duke bërë aferat më të ndyra”, deklaroi Berisha.
Berisha ka folur edhe për rastin e Bankers Petrolium, kompania që fitoi me gjyq një dëmshpërblim prej 37 milion eurosh nga qeveria shqiptare.
“Çfarë fshihet prapa 37 milionshit të Bankers-it. Një e drejtë e pamohueshme e ndërmarrjes. Po a e dini ju që nuk po e apelon qeveria. Është e detyruar qeveria ta apelojë. Veprimi ndaj Bankers-it ishte një veprim arbitrar, zuzar. Ju i tatuat naftën që injektonte në tokë dhe ajo nuk tatohet në asnjë vend. Bankers fitoi dhe ju, jo që e njihni tani, por ulni bishtin ndër shalë dhe nuk e apeloni duke thyer çdo rregull. Një qeveri është e detyruar ligjërisht të apelojë. Po pse nuk e bëni? Sepse është Besnik Sulaj dhe Edi Rama në mes. Sepse nuk bëhet asgjë tjetër veçse punohet nga mëngjesi në darkë me fuqinë e ekzekutivit për interesa të tij”, tha Berisha.
