Nuk ndalet droga nga Shqipëria drejt brigjeve italiane. Policia italiane ka sekuestruar sot në mëngjes 74 kg marijuanë në brigjet e provincës së Leçes pranë plazhit të Cesines që vinte nga Shqipëria.
Droga ka mbërritur në brigjet italiane me anë të një gomone në bordin e së cilës udhëtonin 2 persona.
Skafistët kanë nuhatur kontrollin e forcave të rendit dhe janë larguar përmes detit duke braktisur buzë detit lëndën narkotike.
Marijuana ndodhej në dy çanta të mëdha, e ndarë në 20 pako dhe e ambalazhuar ne letër natriban. Policia italiane thotë se lënda narkotike ishte gati për t’u hedhur në treg dhe mediat lokale italiane informojnë se gomonia me drogë kishte mbërritur nga Shqipëria. Policia është vënë në gjurmë të dy korrierëve, por deri tani e ka të vështirë për t’i identifikuar.
