Ambasadori amerikan Donald Lu i ka quajtur të rinjtë shqiptarë, avangarda e luftës për një politikë pa korrupsion e kriminelë e një ekonomi të zhvilluar.
Në mbylljen e projektit “Unë dhe ti të pastrojmë Shqipërinë”, ku u përfshinë 900 nxënës, Lu tha se janë pikërisht këta të rinj që do sjellin një Shqipëri më të mirë që të garantojë dinjitet për çdo qytetar.
“Unë besoj se të rinjtë udhëheqin jo vetëm në mjedis, por në përmbushjen e të gjitha ëndrrave të kësaj gjenerate. Pa dyshim një botë më të mirë dhe më të pastër për ju dhe fëmijët tuaj të ardhshëm, por gjithashtu një sistem politik të lirë nga korrupsioni dhe kriminelët, një sistem edukimi që u jep mundësi të gjithëve, dhe një ekonomi që krijon vende pune dhe dinjitet për çdo qytetar që punon shumë në këtë vend”, tha ambasadori amerikan.
Ambasadori Lu për të treguar rëndësinë e angazhimit të brezave të rinj solli si shembull historinë e një mikut të tij shqiptar.
“Kam një mik shqiptar dhe po i tregonim njëri-tjetrin për pushimet e verës dhe unë i thashë se çfarë bëmë ne gjatë pushimeve. Ai më tha si kishte shkuar në plazh dhe kishte marrë me vete djalin e tij dhe teksa po pushonin në det dhe ai pasi mbaroi shishen e tij të ujit e hodhi atë në det. Djali i tij që është 5 vjeç ishte aq i inatosur me të atin, po i bërtiste atij që bëri pis planetin dhe i shkaktoi dëm oqeanit dhe i ati pranoi se djali i tij kishte të drejtë”, tha Lu.
