Lëvizja Socialiste për Integrim është tërhequr nga qëndrimi i saj për projektligjin për kamerat e sigurisë duke rënë dakord me nismën e ministrit të Brendshëm Saimir Tahiri.
Ndërsa është kthyer për rishqyrtim nga Presidenti i Republikës, Bujar Nishani, përveç opozitës, ligji ishte kritikuar edhe nga deputetët e LSI-së
Por pas takimeve që Tahiri bëri fillimisht me Ilir Metën dhe një ditë më parë me deputetët e LSI-së, këta të fundit kanë rënë dakord që ligji të ndryshohet.
Duke inspektuar zbatimin e masave të policisë rrugore për edukimin e shoferëve për rripin e sigurimit, ministri Tahiri tha se ky ligji pritet të miratohet seancën e së enjtes së ardhshme të Parlamentit, dhe sipas tij, ligji do të rrisë masat parandaluese kundër kriminalitetit.
“Kemi bërë një punë shumë të madhe në kuadër të goditjes së kriminalitetit dhe sigurisë, por na duhet të bëjmë një punë shumë më të madhe për të parandaluar kriminalitetin. Marr një shembull: një pikë karburanti që ushtron aktivitetin gjatë natës me një operator që mbledh paratë është gjithmonë i rrezikuar krahasuar me një pikë karburanti kur ka një automjet. Në rastin e parë, personi që mbledh paratë është i rrezikuar.
Në rastin e dytë, kemi një automat që nuk është i ekspozuar sa në rastin e parë. Janë këto gjëra të vogla. Një pikë këmbimi valutor dhe një bankë duhet të ketë kamera me rezolucion të lartë.
Nuk mund të ketë një bankë që bën xhiro miliona euro në vit, të ketë kamera sigurie ku nuk dallon dot nëse personat që hyjnë janë burra apo gra. Ky ligj shtron bazat për të pasur masat paraprake për të dekurajuar kriminalitetin. Unë jam i bindur që me deputetët të gjejmë gjuhën për ta miratuar ndoshta të enjten tjetër projektligjin që kam propozuar”, tha Tahiri.
