392 mijë nxënës të arsimit parauniversitar do të nisin vitin e ri shkollor sot. Disa nga librat shkollorë do të mungojnë për nxënësit në këtë ditë të parë të shkollës. Mes tyre 27 mijë vogëlushë do të nisin klasën e parë.
Ditën e Kurban Bajramit shumë nxënës dhe prindër e kaluan në radhë për të marrë librat e shkollës.
“Kemi rreth një orë që presim për të blerë librat. Shkolla fillon nesër (sot) dhe ende s’jemi pajisur me të gjitha tekstet”, – thotë një gjimnaziste e “Ismail Qemalit”, shkruan GSh.
Fotoja u shkrep dje në një librari në rrugën “Hoxha Tasim”, ku shihet dukshëm përpjekja e fëmijëve dhe prindërve për t’u pajisur me tekstet shkollore. Ministria e Arsimit nuk e ka komentuar këtë situatë, edhe pse disa ditë më parë ata sqaruan se mungesat erdhën si pasojë e pullës, por të hënën nuk do ketë asnjë mungesë të teksteve shkollore.
Prindërit janë ankuar edhe më parë se pse kanë pritur, ndërkohë që dje nëpër libraritë e shitjes së teksteve shkollore ka pasur radhë të gjata, dhe sërish nuk kanë arritur t’i marrin të gjitha tekstet për fëmijët, pasi vijojnë mungesat.
“Për të blerë librat e djalit që kam në klasë të 6-të kam shkuar tri herë nëpër librari duke mbajtur edhe radhë të gjata. Dhe sërish na mungon një prej tyre, libri i gjuhës së huaj, Frëngjishtes”, tregon një prind. Ndërsa te shkolla 9-vjeçare “Ali Demi” Tiranë, klasat e para kanë marrë vetëm abetaren dhe asnjë tekst tjetër, ndërsa në klasat e tjera ka mungesë të një ose dy teksteve për çdo klasë/ GSh
