Aktori i famshëm Robert Ndrenika është përballur sot me një gjobë nga Policia Rrugore. Deri këtu nuk ka asgjë për t’u habitur, pasi çdokush që shkel rregullat e qarkullimit rrugor gjobitet. Por është veprimi i polices shumë i diskutueshëm, pasi ajo ka gjobitur Ndrenikën, por ka falur disa të rinj që kishin bërë të njëjtin gabim si Ndrenika.
Si ndodhi ngjarja
Ndrenika sot në mesditë së bashku me disa miq të tij, po pinte një kafe në një nga lokalet e rrugës “Petro Nini Luarasi”. Aty pranë, kishin parkuar përkohësisht automjetin. Pas pak minutash aty ka mbërritur një motor me një polic dhe një police të policisë rrugore.
Sicc thonë të pranishmit, dy-tre makina të tjera që gjendeshin të parkuara pranë asaj të Ndrenikës, duke qenë djem të rinj, kur policja nxori bllokun, ndezën makinat dhe u larguan duke i shpëtuar gjobës. Kurse aktori, tashmë në moshë të thyer, iu desh ca që të afrohej tek policja që po shkruante gjobën.
Mes tyre nisi një debat me tone të qeta, ndërsa Ndrenika u duk i mërzitur, ndoshta për të ishte gjoba e parë, ose ndoshta nuk i pëlqeu veprimi i polices që ndërsa nuk gjobiti makinat e tjera që u larguan sapo ajo u afrua, shkroi gjobën dhe ia vuri në makinë Ndrenikës.
