E gjendur nën akuzat e maturantëve, por edhe të aleatit, Lëvizjes Socialiste për Integrim, ministrja e Arsimit, Lindita Nikolla, ka dhënë sot një konferencë duke thënë se maturantët e raundit të dytë mund të dalin sërish në 10 degë fitues.
“Raundi i parë mundësoi që më të mirë të zgjedhin të parët. Pa dyshim, edhe për të gjithë të tjerët mundësoi një pamje reale, të qartë për ta bërë meritën dhe preferencën tuaj fituese. Ju keni sërish në dispozicion 10 preferenca, dhe pa dyshim mund të jenë edhe 10 preferenca të reja, pranë edhe 10 mundësi të reja pasi keni gjithçka të qartë fal transparencës së raundit të parë. Më të mirët e raundit të dytë mund të ndodhë që të fitojnë sërish edhe 10 degë studimi. Dhe vetëm pasi ata të zgjedhin degën ku preferojnë të studiojnë, janë universitetet ato që përmes spostimit të vijës së kuqe do të plotësojnë kuotat”, tha Nikolla.
Por ministrja e Arsimit nuk shpjegoi pse për regjistrimet nuk ka transparencë dhe nuk foli as për kritikat që i kanë ardhur nga maturantët. Ndërkohë duke folur për ankesat e maturantëve, Nikolla tha se ministria ka 216 ankimime, por pa sqaruar se pse kanë ardhur ato. Mungesa e transparencës për Ministrinë e Arsimit duket se është kthyer në standard.
